тигізудің орташа нүктесі

(Средняя точка попадания)

орташа траекторияның нысана бетімен (бөгет-пен) қиылысу нүктесі. Бұл нүктеге оқтың тимеуі де мүмкін. Т.о.н. ату құралының дәл атысын тексеру барысында 4 оқтесігі бойынша анықталады. Ол үшін тік сызықпен екі оқтесігін қосып, оны екіге тең бөлу керек. Алынған нүктені 3-ші оқтесікпен қосып, олардың арасын тең 3 бөлікке бөлу керек. Алғашқы екі оқтесігіне жақын бөлу нүктесін 4-ші оқтесігіне қосып, ол сызықты 4 тең бөлікке бөлу керек; 4-ші оқтесіктен 3 бөлік алшақ болған нүкте Т.о.н. болып табылады. Т.о.н-н былайша анықтауға да болады: оқтесіктерді қос-қостан тік сызықпен біріктіріп, одан соң тік сызықтарды дәл ортасынан қосып, алынған сызықты 2-ге тең бөлу керек. Бөлінген нүкте Т.о.н. болып шығады. 3 пен 5 ойылма болған жағдайда да Т.о.н. осылай анықталады. Тигізулер көп болған жағдайда Т.о.н. шашырау осьтерін қолдану немесе есептеу әдістері арқылы анықталады.